کوچۂ شوق سے جب سوختہ جاں گزرے ہیں

کوچۂ شوق سے جب سوختہ جاں گزرے ہیں

دل پہ کیا کیا غم و حسرت کے جہاں گزرے ہیں

پہلے ہوتے تھے ہمیں بزم کی رونق لیکن

تیری محفل پہ ہمیں آج گراں گزرے ہیں

لاکھ تاریک سہی ہم پہ فضائے ہستی

پھر بھی روشن کیے ہم مشعل جاں گزرے ہیں

جن سے اب کچھ بھی نہیں تجھ کو تعلق باقی

تیرے کوچے سے وہی شعلہ بہ جاں گزرے ہیں

سیکڑوں شمعیں ہوئیں دل میں ہمارے روشن

ہم کو کیا کیا تری فرقت میں گماں گزرے ہیں

شدت عشق میں وہ کوچہ نوردی کی ہے

نہیں معلوم کدھر ٹھہرے کہاں گزرے ہیں