kucha-e-shauq se jab soKHta-jaan guzre hain

kūcha-e-shauq se jab soḳhta-jāñ guzre haiñ

dil pe kyā kyā ġham-o-hasrat ke jahāñ guzre haiñ

pahle hote the hameñ bazm kī raunaq lekin

terī mahfil pe hameñ aaj girāñ guzre haiñ

laakh tārīk sahī ham pe fazā-e-hastī

phir bhī raushan kiye ham mish.al-e-jāñ guzre haiñ

jin se ab kuchh bhī nahīñ tujh ko ta.alluq baaqī

tere kūche se vahī shola-ba-jāñ guzre haiñ

saikḌoñ sham.eñ huiiñ dil meñ hamāre raushan

ham ko kyā kyā tirī furqat meñ gumāñ guzre haiñ

shiddat-e-ishq meñ vo kūcha-navardī kī hai

nahīñ ma.alūm kidhar Thahre kahāñ guzre haiñ

kucha-e-shauq se jab soKHta-jaan guzre hain

dil pe kya kya gham-o-hasrat ke jahan guzre hain

pahle hote the hamein bazm ki raunaq lekin

teri mahfil pe hamein aaj giran guzre hain

lakh tarik sahi hum pe faza-e-hasti

phir bhi raushan kiye hum mishal-e-jaan guzre hain

jin se ab kuchh bhi nahin tujh ko talluq baqi

tere kuche se wahi shola-ba-jaan guzre hain

saikDon shamen huin dil mein hamare raushan

hum ko kya kya teri furqat mein guman guzre hain

shiddat-e-ishq mein wo kucha-nawardi ki hai

nahin malum kidhar Thahre kahan guzre hain