کوچہ کوچہ بھٹک رہا ہوں میں

کوچہ کوچہ بھٹک رہا ہوں میں

آسمانوں کو تک رہا ہوں میں

جبکہ وعدہ ہے مشک و عنبر کا

روٹیاں کیوں لپک رہا ہوں میں

اس مقرر پہ میرا سایہ ہے

گفتگو میں جھلک رہا ہوں میں

اس نے پوچھا ہے خط میں حال مرا

فطرتاً پھر جھجھک رہا ہوں میں

دشت میں چار دن گزارے ہیں

جگنوؤں سا دمک رہا ہوں میں

کون پوچھے گا مجھ کو میرے بعد

کس کی خاطر یہ تھک رہا ہوں میں

یہ جو میں مسکرا کے ملتا ہوں

اپنے گریہ کو ڈھک رہا ہوں میں

داغؔ کہتے تھے کیا غزل پیاری

اور مصرعوں میں بک رہا ہوں میں