kuza-gar dekh agar chaak pe aana hai mujhe

kūza-gar dekh agar chaak pe aanā hai mujhe

phir tire haath se har chaak silānā hai mujhe

bāñdh rakkhe haiñ mire paañv meñ ghuñgrū kis ne

apnī sur-tāl pe ab kis ne nachānā hai mujhe

rāt-bhar dekhtā aayā huuñ charāġhoñ kā dhuāñ

sub.h-e-āshūr se ab aañkh milānā hai mujhe

haath uTThe na koī ab ke duā kī ḳhātir

ek dīvār pas-e-dār banānā hai mujhe

sar bache yā na bache tere ziyāñ-ḳhāne meñ

apnī dastār bahar-taur bachānā hai mujhe

chhoḌ aayā huuñ dar-e-dil pe maiñ āñkheñ apnī

ab zarā jaa.e jo kahtā thā ki jaanā hai mujhe

kuza-gar dekh agar chaak pe aana hai mujhe

phir tere hath se har chaak silana hai mujhe

bandh rakkhe hain mere panw mein ghungru kis ne

apni sur-tal pe ab kis ne nachana hai mujhe

raat-bhar dekhta aaya hun charaghon ka dhuan

subh-e-ashur se ab aankh milana hai mujhe

hath uTThe na koi ab ke dua ki KHatir

ek diwar pas-e-dar banana hai mujhe

sar bache ya na bache tere ziyan-KHane mein

apni dastar bahar-taur bachana hai mujhe

chhoD aaya hun dar-e-dil pe main aankhen apni

ab zara jae jo kahta tha ki jaana hai mujhe