kya aasman se rabt-e-yaqin mahw-e-KHwab hai

kyā āsmāñ se rabt-e-yaqīñ mahv-e-ḳhvāb hai

soī huī hai ḳhāk-e-zamīñ mahv-e-ḳhvāb hai

hai niiñd meñ itā.at-o-irfāñ kā silsila

sajdoñ ke saath saath jabīñ mahv-e-ḳhvāb hai

so.e hue to so.e haiñ dekho magar yahāñ

jo jāgtā hai vo bhī kahīñ mahv-e-ḳhvāb hai

ye shahr gahrī niiñd meñ jaatā nahīñ kabhī

har shaḳhs apne apne ta.iiñ mahv-e-ḳhvāb hai

ik ik sitāra niiñd kī haibat meñ hai sharīk

vo raat hai ki māh-e-mubīñ mahv-e-ḳhvāb hai

āñkhoñ se uTh rahā hai dhuāñ aur dhueñ se dukh

jalte hue makāñ meñ makīñ mahv-e-ḳhvāb hai

parkār chal rahī hai kahīñ gahrī niiñd meñ

ai 'zeb' merā hāshiya-bīñ mahv-e-ḳhvāb hai

kya aasman se rabt-e-yaqin mahw-e-KHwab hai

soi hui hai KHak-e-zamin mahw-e-KHwab hai

hai nind mein itaat-o-irfan ka silsila

sajdon ke sath sath jabin mahw-e-KHwab hai

soe hue to soe hain dekho magar yahan

jo jagta hai wo bhi kahin mahw-e-KHwab hai

ye shahr gahri nind mein jata nahin kabhi

har shaKHs apne apne tain mahw-e-KHwab hai

ek ek sitara nind ki haibat mein hai sharik

wo raat hai ki mah-e-mubin mahw-e-KHwab hai

aankhon se uTh raha hai dhuan aur dhuen se dukh

jalte hue makan mein makin mahw-e-KHwab hai

parkar chal rahi hai kahin gahri nind mein

ai 'zeb' mera hashiya-bin mahw-e-KHwab hai