kya ab meri kahani mein

kyā ab mirī kahānī meñ

maiñ huuñ gale tak paanī meñ

jaise maiñ shāmil hī nahīñ

apnī sar-o-sāmānī meñ

merī tarah Thahregā kaun

sail-e-harf-o-ma.ānī meñ

rakkho mujhe ik tinke par

dekho mujhe tuġhyānī meñ

ik ā.īna toḌo aur

Daalo mujhe hairānī meñ

ik khañDar huuñ yādoñ kā

jhāñko mirī vīrānī meñ

be-pāyāñ be-hadd-o-hisāb

maiñ apnī jaulānī meñ

gard mirī sab tiir o ġhazāl

maiñ aage huuñ ravānī meñ

lutf mujhe aatā hai 'ramz'

apnī marsiya-ḳhvānī meñ

kya ab meri kahani mein

main hun gale tak pani mein

jaise main shamil hi nahin

apni sar-o-samani mein

meri tarah Thahrega kaun

sail-e-harf-o-maani mein

rakkho mujhe ek tinke par

dekho mujhe tughyani mein

ek aaina toDo aur

Dalo mujhe hairani mein

ek khanDar hun yaadon ka

jhanko meri virani mein

be-payan be-hadd-o-hisab

main apni jaulani mein

gard meri sab tir o ghazal

main aage hun rawani mein

lutf mujhe aata hai 'ramz'

apni marsiya-KHwani mein