kya adu kya dost sab ko bha gain ruswaiyan

kyā adū kyā dost sab ko bhā ga.iiñ rusvā.iyāñ

kaun aa kar nāptā ehsās kī pahnā.iyāñ

ab kisī mausam kī be-rahmī kā koī ġham nahīñ

ham ne āñkhoñ meñ sajā.ī haiñ tirī añgḌā.iyāñ

aap kyā aa.e bahāroñ ke darīche khul ga.e

ḳhushbuoñ meñ bas ga.iiñ tarsī huī tanhā.iyāñ

chāñd ban kar kaun utrā hai qabā-e-jism meñ

jaag uTThī haiñ ḳhayāl-o-fikr kī gahrā.iyāñ

dil pe hai chhāyā huā bedār ḳhvāboñ kā tilism

zehn ke āñgan meñ lahrātī haiñ kuchh parchhā.iyāñ

aaj 'fāriġh' ujḌe ujḌe se haiñ 'ġhālib' kī tarah

yaad thiiñ ham ko bhī rañgā-rañg bazm-ārā.īyāñ

kya adu kya dost sab ko bha gain ruswaiyan

kaun aa kar napta ehsas ki pahnaiyan

ab kisi mausam ki be-rahmi ka koi gham nahin

hum ne aankhon mein sajai hain teri angDaiyan

aap kya aae bahaaron ke dariche khul gae

KHushbuon mein bas gain tarsi hui tanhaiyan

chand ban kar kaun utra hai qaba-e-jism mein

jag uTThi hain KHayal-o-fikr ki gahraiyan

dil pe hai chhaya hua bedar KHwabon ka tilism

zehn ke aangan mein lahraati hain kuchh parchhaiyan

aaj 'farigh' ujDe ujDe se hain 'ghaalib' ki tarah

yaad thin hum ko bhi ranga-rang bazm-araiyan