kya ajab fart-e-KHushi se hai jo giryan aadmi

kyā 'ajab fart-e-ḳhushī se hai jo giryāñ aadmī

kasrat-e-ġham meñ nazar aatā hai ḳhandāñ aadmī

qatra-e-be-māya lekin bahr-e-nā-paidā-kanār

zarra-e-nāchīz vus'at meñ bayābāñ aadmī

pur-sukūñ hālāt meñ ḳhāmosh sāhil kī tarah

shorish-e-jazbāt meñ mānind-e-tūfāñ aadmī

is kī vahshat kā mudāvā kar nahīñ saktā koī

ḳhud agar chāhe to ban saktā hai insāñ aadmī

ādmiyyat agle vaqtoñ meñ thī ik anmol shai

aaj ke hālāt meñ hai jins-e-arzāñ aadmī

zindagī kī saḳht rāhoñ kā safar darpesh hai

kārvāñ-dar-kārvāñ hai pā-ba-jaulāñ aadmī

apne zaḳhmoñ kā mudāvā ġhair mumkin to nahīñ

ai 'hazīñ' saare dukhoñ kā ḳhud hai darmāñ aadmī

kya 'ajab fart-e-KHushi se hai jo giryan aadmi

kasrat-e-gham mein nazar aata hai KHandan aadmi

qatra-e-be-maya lekin bahr-e-na-paida-kanar

zarra-e-nachiz wus'at mein bayaban aadmi

pur-sukun haalat mein KHamosh sahil ki tarah

shorish-e-jazbaat mein manind-e-tufan aadmi

is ki wahshat ka mudawa kar nahin sakta koi

KHud agar chahe to ban sakta hai insan aadmi

aadmiyyat agle waqton mein thi ek anmol shai

aaj ke haalat mein hai jins-e-arzan aadmi

zindagi ki saKHt rahon ka safar darpesh hai

karwan-dar-karwan hai pa-ba-jaulan aadmi

apne zaKHmon ka mudawa ghair mumkin to nahin

ai 'hazin' sare dukhon ka KHud hai darman aadmi