kya bataen gham-e-furqat mein kahan se guzre

kyā batā.eñ ġham-e-furqat meñ kahāñ se guzre

mausam-e-gul se jo nikle to ḳhizāñ se guzre

dil se āñkhoñ se makīnoñ se makāñ se guzre

dard phir dard hai jab chāhe jahāñ se guzre

husn kī shoḳh-sarī kā yahī hāsil niklā

ātish-e-ishq baḌhī āh-o-fuġhāñ se guzre

raqs karte hī rahe ḳhvāb dhunoñ par lekin

saañs ke taar sabhī soz-e-nihāñ se guzre

bā-vazū ho ke mirā zikr jo karte the kabhī

aaj palTe haiñ zabāñ se vo bayāñ se guzre

vo mohabbat ho ke īsār-o-vafā ho 'zākir'

ishq ke tiir shab-o-roz kamāñ se guzre

kya bataen gham-e-furqat mein kahan se guzre

mausam-e-gul se jo nikle to KHizan se guzre

dil se aankhon se makinon se makan se guzre

dard phir dard hai jab chahe jahan se guzre

husn ki shoKH-sari ka yahi hasil nikla

aatish-e-ishq baDhi aah-o-fughan se guzre

raqs karte hi rahe KHwab dhunon par lekin

sans ke tar sabhi soz-e-nihan se guzre

ba-wazu ho ke mera zikr jo karte the kabhi

aaj palTe hain zaban se wo bayan se guzre

wo mohabbat ho ke isar-o-wafa ho 'zakir'

ishq ke tir shab-o-roz kaman se guzre