kya bataen kya kal shab aaKHiri pahar dekha

kyā batā.eñ kyā kal shab āḳhirī pahar dekhā

kār-gāh-e-gardūñ par chāñd kā safar dekhā

jalva-gāh-e-hastī meñ husn jalva-gar dekhā

haa.e ham-nafas mat pūchh kab kahāñ kidhar dekhā

aah vo shab-e-pur-nam uf vo nuur kī mahfil

darmiyāñ sitāroñ ke jalva-e-qamar dekhā

us jamāl-e-uryāñ ko sirf ik nazar dekhā

phir vahī nazar aayā jab jahāñ jidhar dekhā

haa.e ai mujassam husn rashk-e-nūr-o-tābānī

tū ne mere ḳhirman ko ḳhuub phūñk kar dekhā

shab Dhalī to ai 'sālim' mah nasheb meñ utrā

ik chakor ko dekhā aur ba-chashm-e-tar dekhā

kya bataen kya kal shab aaKHiri pahar dekha

kar-gah-e-gardun par chand ka safar dekha

jalwa-gah-e-hasti mein husn jalwa-gar dekha

hae ham-nafas mat puchh kab kahan kidhar dekha

aah wo shab-e-pur-nam uf wo nur ki mahfil

darmiyan sitaron ke jalwa-e-qamar dekha

us jamal-e-uryan ko sirf ek nazar dekha

phir wahi nazar aaya jab jahan jidhar dekha

hae ai mujassam husn rashk-e-nur-o-tabani

tu ne mere KHirman ko KHub phunk kar dekha

shab Dhali to ai 'salim' mah nasheb mein utra

ek chakor ko dekha aur ba-chashm-e-tar dekha