kya bataun ke mere waste kya kya tum ho

kyā batā.ūñ ke mire vāste kyā kyā tum ho

merī ġhazleñ mirī nazmeñ mirā lahja tum ho

duniyā vāloñ se ta.alluq nahīñ rakkhā maiñ ne

mujh ko duniyā se ġharaz kyā mirī duniyā tum ho

tum ko is darja aqīdat se paḌhā hai jaise

āsmānoñ se jo utrā vo sahīfa tum ho

tum na hote to mirī ziist kaThin ho jaatī

mere jīvan ke añdhere meñ ujālā tum ho

kyuuñ masīhāoñ se marham kī talab ho mujh ko

sach to ye hai mire zaḳhmoñ kā mudāvā tum ho

merī shohrat kā vasīla hai tumhārī nisbat

merī pahchān ho tum merā havāla tum ho

apnī taqdīr ke likkhe pe hai īmān mirā

mere hamdam mirī taqdīr kā likkhā tum ho

kya bataun ke mere waste kya kya tum ho

meri ghazlen meri nazmen mera lahja tum ho

duniya walon se talluq nahin rakkha main ne

mujh ko duniya se gharaz kya meri duniya tum ho

tum ko is darja aqidat se paDha hai jaise

aasmanon se jo utra wo sahifa tum ho

tum na hote to meri zist kaThin ho jati

mere jiwan ke andhere mein ujala tum ho

kyun masihaon se marham ki talab ho mujh ko

sach to ye hai mere zaKHmon ka mudawa tum ho

meri shohrat ka wasila hai tumhaari nisbat

meri pahchan ho tum mera hawala tum ho

apni taqdir ke likkhe pe hai iman mera

mere hamdam meri taqdir ka likkha tum ho