kya bataun mujhe kya yaad hai kya yaad nahin

kyā batā.ūñ mujhe kyā yaad hai kyā yaad nahīñ

itne ġham haiñ ki ġham-hosh zarā yaad nahīñ

is gunahgār-e-mohabbat pe ḳhudā rahm kare

jis ko kuchh terī mohabbat ke sivā yaad nahīñ

merī dīvāna mizājī pe hai ilzām magar

apnī begāna-nigāhī kī adā yaad nahīñ

tum ne kuchh mujh se kahā thā dam-e-ruḳhsat ik din

ab ḳhudā jaane tumheñ yaad hai yā yaad nahīñ

yā vo aalam thā ki thī sāmne manzil 'rāhī'

yā ye hālat hai ḳhud apnā patā yaad nahīñ

kya bataun mujhe kya yaad hai kya yaad nahin

itne gham hain ki gham-hosh zara yaad nahin

is gunahgar-e-mohabbat pe KHuda rahm kare

jis ko kuchh teri mohabbat ke siwa yaad nahin

meri diwana mizaji pe hai ilzam magar

apni begana-nigahi ki ada yaad nahin

tum ne kuchh mujh se kaha tha dam-e-ruKHsat ek din

ab KHuda jaane tumhein yaad hai ya yaad nahin

ya wo aalam tha ki thi samne manzil 'rahi'

ya ye haalat hai KHud apna pata yaad nahin