kya de gai fareb kisi ki nazar mujhe

kyā de ga.ī fareb kisī kī nazar mujhe

duniyā kā hosh hai na kuchh apnī ḳhabar mujhe

jiine kī aarzū hai na marne kī aarzū

aisā diyā hai ishq ne ik dard-e-sar mujhe

muusā ga.e the tuur pe jalve ko dekhne

aatā hai chār-sū tirā jalva nazar mujhe

jab tak shu.ūr-o-aql mire saath meñ rahe

lagtī thī rāh-e-ishq bahut pur-ḳhatar mujhe

vo ham-nashīñ thā merā maiñ thā us kā ham-nashīñ

ab kyoñ ḳhafā hai vo nahīñ us kī ḳhabar mujhe

allāh re ye husn-e-tasavvur kī vus.ateñ

jis samt maiñ ne dekhā vo aa.e nazar mujhe

jaanā hai mujh ko duur abhī aur ai 'azīz'

bilkul ravā nahīñ hai kahīñ bhī hazar mujhe

kya de gai fareb kisi ki nazar mujhe

duniya ka hosh hai na kuchh apni KHabar mujhe

jine ki aarzu hai na marne ki aarzu

aisa diya hai ishq ne ek dard-e-sar mujhe

musa gae the tur pe jalwe ko dekhne

aata hai chaar-su tera jalwa nazar mujhe

jab tak shuur-o-aql mere sath mein rahe

lagti thi rah-e-ishq bahut pur-KHatar mujhe

wo ham-nashin tha mera main tha us ka ham-nashin

ab kyon KHafa hai wo nahin us ki KHabar mujhe

allah re ye husn-e-tasawwur ki wusaten

jis samt main ne dekha wo aae nazar mujhe

jaana hai mujh ko dur abhi aur ai 'aziz'

bilkul rawa nahin hai kahin bhi hazar mujhe