kya dekhen hum suraj chand sitaron mein

kyā dekheñ ham sūraj chāñd sitāroñ meñ

un kā chehra raushan hai añdhiyāroñ meñ

roz tumhārī ḳhabreñ paḌhte rahte haiñ

tum to bas ab milte ho aḳhbāroñ meñ

darvāze par naam tumhārā likkhā hai

naqsh tumhāre sabt hue dīvāroñ meñ

bachche ḳhauf se ghar se bāhar na nikleñ

dhuul uḌtī hai galiyoñ meñ chaubāroñ meñ

apne jaisī faanī chiiz banātā hai

ik ye kamī hai insāñ ke shahkāroñ meñ

peshānī par daaġh numāyāñ rahtā hai

sajde karte phirte haiñ darbāroñ meñ

ilm hunar aur fan to ab matrūk hue

khoTe sikke chalte haiñ bāzāroñ meñ

ahd-e-nau kī 'nuzhat' ham buniyād rakheñ

fikr na.ī ab shāmil ho fan-pāroñ meñ

kya dekhen hum suraj chand sitaron mein

un ka chehra raushan hai andhiyaron mein

roz tumhaari KHabren paDhte rahte hain

tum to bas ab milte ho aKHbaron mein

darwaze par nam tumhaara likkha hai

naqsh tumhaare sabt hue diwaron mein

bachche KHauf se ghar se bahar na niklen

dhul uDti hai galiyon mein chaubaron mein

apne jaisi fani chiz banata hai

ek ye kami hai insan ke shahkaron mein

peshani par dagh numayan rahta hai

sajde karte phirte hain darbaron mein

ilm hunar aur fan to ab matruk hue

khoTe sikke chalte hain bazaron mein

ahd-e-nau ki 'nuzhat' hum buniyaad rakhen

fikr nai ab shamil ho fan-paron mein