kya dilkashi-e-gesu-e-jaanan hai aaj-kal

kyā dilkashī-e-gesū-e-jānāñ hai āj-kal

duniyā ba-qaid-e-kufr musalmāñ hai āj-kal

ḳhud husn inqalāb-ba-dāmāñ hai āj-kal

hāthoñ meñ un ke merā girebāñ hai āj-kal

taare haiñ aab aab to ġhunche araq araq

apne kiye pe koī pashemāñ hai āj-kal

insān ko navāze jo insān kī tarah

aisā bhī koī duniyā meñ insāñ hai āj-kal

nādāñ ye iḳhtiyār ba anjām jabr hai

gulshan bhī apne vaqt kā zindāñ hai āj-kal

ḳhāliq hai aap apnī pareshāniyoñ kā vo

duniyā meñ jo bashar bhī pareshāñ hai āj-kal

duniyā-e-husn-e-zan se alag ho ke dekhiye

vaj.h-e-sukūñ chaman hai na zindāñ hai āj-kal

barbādiyāñ bhī tishna-e-takmīl haiñ 'shifā'

gardish meñ ḳhud bhī gardish-e-daurāñ hai āj-kal

kya dilkashi-e-gesu-e-jaanan hai aaj-kal

duniya ba-qaid-e-kufr musalman hai aaj-kal

KHud husn inqalab-ba-daman hai aaj-kal

hathon mein un ke mera gireban hai aaj-kal

tare hain aab aab to ghunche araq araq

apne kiye pe koi pasheman hai aaj-kal

insan ko nawaze jo insan ki tarah

aisa bhi koi duniya mein insan hai aaj-kal

nadan ye iKHtiyar ba anjam jabr hai

gulshan bhi apne waqt ka zindan hai aaj-kal

KHaliq hai aap apni pareshaniyon ka wo

duniya mein jo bashar bhi pareshan hai aaj-kal

duniya-e-husn-e-zan se alag ho ke dekhiye

wajh-e-sukun chaman hai na zindan hai aaj-kal

barbaadiyan bhi tishna-e-takmil hain 'shifa'

gardish mein KHud bhi gardish-e-dauran hai aaj-kal