kya farogh-e-bazm us mah-ru ka shab sad-rang tha

kyā faroġh-e-bazm us mah-rū kā shab sad-rañg thā

sham.a nahiñ sharminda aur mah dekh ruḳh ko dañg thā

kyuuñ na rakhkhūñ daaġh dil par jaise laala dar-e-chaman

ḳhaal ġhair-e-fām us ruḳhsār par gul-rañg thā

sharmgīñ āñkhoñ se jis jānib ko paḌtī hai nazar

nāzukī shamshīr se bismil pe arsa tañg thā

qatl meñ āshiq ke shab ko kyā tujhe tāḳhīr hai

shor ġhul thā dhuum thī aur izhdihām āhañg thā

aah zaarī par kisī kī vo na kartā thā ḳhayāl

gosh-e-zad-āvāz us dam Dholak-o-mirdañg thā

ho gayā mahv-e-tamāshā ġhair kī mahfil meñ kyuuñ

ġhair tere dil mirā jyuuñ shīsha vaqf-e-sañg thā

'āfrīdī' ishq ke baa.is hayā jaatī rahī

kyā huā tere ta.iiñ da.avā jo nām-o-nañg thā

kya farogh-e-bazm us mah-ru ka shab sad-rang tha

shama nahin sharminda aur mah dekh ruKH ko dang tha

kyun na rakhkhun dagh dil par jaise lala dar-e-chaman

KHal ghair-e-fam us ruKHsar par gul-rang tha

sharmgin aankhon se jis jaanib ko paDti hai nazar

nazuki shamshir se bismil pe arsa tang tha

qatl mein aashiq ke shab ko kya tujhe taKHir hai

shor ghul tha dhum thi aur izhdiham aahang tha

aah zari par kisi ki wo na karta tha KHayal

gosh-e-zad-awaz us dam Dholak-o-mirdang tha

ho gaya mahw-e-tamasha ghair ki mahfil mein kyun

ghair tere dil mera jyun shisha waqf-e-sang tha

'afridi' ishq ke bais haya jati rahi

kya hua tere tain dawa jo nam-o-nang tha