kya gham hai agar wo mera diwana nahin hai

kyā ġham hai agar vo mirā dīvāna nahīñ hai

dil merā bhī ābād hai vīrāna nahīñ hai

patthar ko basā.ūñgā nahīñ is meñ kabhī maiñ

dil merā haram hai koī but-ḳhāna nahīñ hai

jhuktā hai tū mahbūb kī dahlīz pe kyūñkar

ye dar to mire sar dar-e-jānāna nahīñ hai

vo āh-o-fuġhāñ terī bhalā kyoñ hī sunegā

bismil tirā andāz ġharībāna nahīñ hai

tū bol ki ho kaise ḳhudā tujh se muḳhātib

guftār tirī tarz-e-kalīmāna nahīñ hai

vo sham.a kare faḳhr bhalā ḳhud pe to kaise

dahlīz pe jis kī koī parvāna nahīñ hai

botal ko liye aur kahāñ phirtā rahūñ maiñ

saaqī tire maiḳhāne meñ paimāna nahīñ hai

ḳhvāboñ meñ 'zuhaib' aatā hai mere vo barābar

aisā nahīñ us se mirā yārāna nahīñ hai

kya gham hai agar wo mera diwana nahin hai

dil mera bhi aabaad hai virana nahin hai

patthar ko basaunga nahin is mein kabhi main

dil mera haram hai koi but-KHana nahin hai

jhukta hai tu mahbub ki dahliz pe kyunkar

ye dar to mere sar dar-e-jaanana nahin hai

wo aah-o-fughan teri bhala kyon hi sunega

bismil tera andaz gharibana nahin hai

tu bol ki ho kaise KHuda tujh se muKHatib

guftar teri tarz-e-kalimana nahin hai

wo shama kare faKHr bhala KHud pe to kaise

dahliz pe jis ki koi parwana nahin hai

botal ko liye aur kahan phirta rahun main

saqi tere maiKHane mein paimana nahin hai

KHwabon mein 'zuhaib' aata hai mere wo barabar

aisa nahin us se mera yarana nahin hai