kya gham ke sath hum jien aur kya KHushi ke sath

kyā ġham ke saath ham ji.eñ aur kyā ḳhushī ke saath

jo dil ko de sukūn guzar ho usī ke saath

kāġhaz kī naav merī palaT kar na aa sakī

bachpan meñ merā dil bhī bahā thā usī ke saath

āñkhoñ ke sote ḳhushk hue raushnī ga.ī

lekin nazar kā rishta vahī hai namī ke saath

kyā maut hī ilaaj hai ġham se najāt kā

kyoñ zindagī kī banñe lagī ḳhud-kushī ke saath

logoñ ko kyā paḌī hai jo pūchheñ kisī se haal

har aadmī magan hai ġham-e-zindagī ke saath

jin ke nasīb meñ nahīñ duniyā kī rāhateñ

dekho to kaise jiite haiñ vo har kamī ke saath

majbūroñ bekasoñ kī yahāñ fikr hai kise

be-maut kitne marte haiñ fāqa-kashī ke saath

fursat hai kis ke paas jo soche ye baiTh kar

kis kī banī kisī se yā bigḌī kisī ke saath

rishtoñ kī bhiiḌ meñ jo maiñ sābit-qadam rahī

dil ke tamām jabr sahe ḳhush-dilī ke saath

laa.eñ kahāñ se DhūñD ke apnā kaheñ jise

raste take haiñ ham ne bhī āshuftagī ke saath

'shahnāz' apne lahje meñ narmī ḳhulūs rakh

kar baat har kisī se bahut ājizī ke saath

kya gham ke sath hum jien aur kya KHushi ke sath

jo dil ko de sukun guzar ho usi ke sath

kaghaz ki naw meri palaT kar na aa saki

bachpan mein mera dil bhi baha tha usi ke sath

aankhon ke sote KHushk hue raushni gai

lekin nazar ka rishta wahi hai nami ke sath

kya maut hi ilaj hai gham se najat ka

kyon zindagi ki banne lagi KHud-kushi ke sath

logon ko kya paDi hai jo puchhen kisi se haal

har aadmi magan hai gham-e-zindagi ke sath

jin ke nasib mein nahin duniya ki rahaten

dekho to kaise jite hain wo har kami ke sath

majburon bekason ki yahan fikr hai kise

be-maut kitne marte hain faqa-kashi ke sath

fursat hai kis ke pas jo soche ye baiTh kar

kis ki bani kisi se ya bigDi kisi ke sath

rishton ki bhiD mein jo main sabit-qadam rahi

dil ke tamam jabr sahe KHush-dili ke sath

laen kahan se DhunD ke apna kahen jise

raste take hain hum ne bhi aashuftagi ke sath

'shahnaz' apne lahje mein narmi KHulus rakh

kar baat har kisi se bahut aajizi ke sath