kya gharaz is se kisi ko kitna hai dil-gir kaun

kyā ġharaz is se kisī ko kitnā hai dil-gīr kaun

dekhnā hai ye pahan kar mar gayā zanjīr kaun

log sharmāte haiñ kyoñ sar par use rakhte hue

le gayā hai chhīn kar dastār kī tauqīr kaun

peT kī majbūriyāñ fankār tak bhī aa ga.iiñ

varna dilbar kī banā kar bechtā tasvīr kaun

merī āñkhoñ ke darīche ḳhuun meñ tar ho ga.e

ḳhuun meñ tar ḳhvāb kī batlā.egā ta.abīr kaun

is farishtoñ ke jahāñ meñ sirf maiñ insān huuñ

hotā phir mere alāva qā.il-e-taqsīr kaun

har kisī ko dastaras hai gardish-e-ayyām tak

maut ke andhe safar kī khīñchtā tasvīr kaun

kis ko fursat hai yahāñ ḳhud-ehtisābī ke liye

dekhtā hai 'jān' apnī aañkh kā shahtīr kaun

kya gharaz is se kisi ko kitna hai dil-gir kaun

dekhna hai ye pahan kar mar gaya zanjir kaun

log sharmate hain kyon sar par use rakhte hue

le gaya hai chhin kar dastar ki tauqir kaun

peT ki majburiyan fankar tak bhi aa gain

warna dilbar ki bana kar bechta taswir kaun

meri aankhon ke dariche KHun mein tar ho gae

KHun mein tar KHwab ki batlaega tabir kaun

is farishton ke jahan mein sirf main insan hun

hota phir mere alawa qail-e-taqsir kaun

har kisi ko dastaras hai gardish-e-ayyam tak

maut ke andhe safar ki khinchta taswir kaun

kis ko fursat hai yahan KHud-ehtisabi ke liye

dekhta hai 'jaan' apni aankh ka shahtir kaun