kya guzar kijiye sayyaad-e-dil-azar ke pas

kyā guzar kījiye sayyād-e-dil-āzār ke paas

barg-e-gul pheñktā hai murġh-e-giraftār ke paas

tere bīmār kī bālīñ pe khaḌī hai hasrat

maut baiThī nazar aatī hai vo ġham-ḳhvār ke paas

baar baar aa ke vo Thahrāte haiñ saudā dil kā

ghar unhoñ ne jo banāyā hai to bāzār ke paas

shāḳh-e-gul dekh ke sāmān-e-ḳhalish yaad aayā

rakh diyā pārā-e-dil dil ko har ik ḳhaar ke paas

tere darvāza pe fitnoñ ne liyā dam aa kar

thak ke baiThī hai qayāmat tirī dīvār ke paas

zāhidā rahmat-e-bārī bhī ba-rañg-e-tauba

aa ga.ī TuuT ke rindān qadah-ḳhvār ke paas

merī ḳhvārī hī qayāmat meñ mire kaam aa.ī

koī aayā na 'vafā' mujh se gunahgār ke paas

kya guzar kijiye sayyaad-e-dil-azar ke pas

barg-e-gul phenkta hai murgh-e-giraftar ke pas

tere bimar ki baalin pe khaDi hai hasrat

maut baiThi nazar aati hai wo gham-KHwar ke pas

bar bar aa ke wo Thahraate hain sauda dil ka

ghar unhon ne jo banaya hai to bazar ke pas

shaKH-e-gul dekh ke saman-e-KHalish yaad aaya

rakh diya para-e-dil dil ko har ek KHar ke pas

tere darwaza pe fitnon ne liya dam aa kar

thak ke baiThi hai qayamat teri diwar ke pas

zahida rahmat-e-bari bhi ba-rang-e-tauba

aa gai TuT ke rindan qadah-KHwar ke pas

meri KHwari hi qayamat mein mere kaam aai

koi aaya na 'wafa' mujh se gunahgar ke pas