kya haal-e-dil sunaun tujhe dekhne ke baad

kyā hāl-e-dil sunā.ūñ tujhe dekhne ke baad

vo dil kahāñ se lā.ūñ tujhe dekhne ke baad

dekhe baġhair the ka.ī shikve gile magar

kaise zabāñ pe lā.ūñ tujhe dekhne ke baad

mab.hūt ho gayā huuñ tirī ik jhalak se maiñ

lab kis tarah hilā.ūñ tujhe dekhne ke baad

duniyā kā zikr kyā hai ki ḳhud apne aap ko

mumkin hai bhuul jā.ūñ tujhe dekhne ke baad

sarshār ho gayā huuñ tirī ik nigāh se

ab kyā piyūñ pilā.ūñ tujhe dekhne ke baad

nazroñ meñ ishtiyāq-e-nazar hī nahīñ rahā

kis se nazar milā.ūñ tujhe dekhne ke baad

āsāñ the pahle saare masā.il mire liye

ab kuchh samajh na pā.ūñ tujhe dekhne ke baad

kis rāste se ho ke maiñ aaya nahīñ hai yaad

ab ghar ko kaise jā.ūñ tujhe dekhne ke baad

'rāhī' bhī mere saath thā dīdār meñ sharīk

ab kaise saath lā.ūñ tujhe dekhne ke baad

kya haal-e-dil sunaun tujhe dekhne ke baad

wo dil kahan se laun tujhe dekhne ke baad

dekhe baghair the kai shikwe gile magar

kaise zaban pe laun tujhe dekhne ke baad

mabhut ho gaya hun teri ek jhalak se main

lab kis tarah hilaun tujhe dekhne ke baad

duniya ka zikr kya hai ki KHud apne aap ko

mumkin hai bhul jaun tujhe dekhne ke baad

sarshaar ho gaya hun teri ek nigah se

ab kya piyun pilaun tujhe dekhne ke baad

nazron mein ishtiyaq-e-nazar hi nahin raha

kis se nazar milaun tujhe dekhne ke baad

aasan the pahle sare masail mere liye

ab kuchh samajh na paun tujhe dekhne ke baad

kis raste se ho ke main aaya nahin hai yaad

ab ghar ko kaise jaun tujhe dekhne ke baad

'rahi' bhi mere sath tha didar mein sharik

ab kaise sath laun tujhe dekhne ke baad