کیا ہے دنیا دل نادان نے سمجھا کیا ہے

کیا ہے دنیا دل نادان نے سمجھا کیا ہے

گاہے غم گاہے خوشی اور یہاں رکھا کیا ہے

صرف اعمال ہیں انساں کا اثاثہ کیا ہے

چھوڑ کر جانا ہے سب کچھ یہاں اپنا کیا ہے

ٹھوکریں کھائی ہیں جس نے ذرا اس سے پوچھو

تم نے دہلیز کے پتھر کو بھی سمجھا کیا ہے

یہ کیا سمجھیں گے وفا رسم محبت اخلاق

آج کے دور کے انسان نے دیکھا کیا ہے

پھول اور پھل کی تمنا تو ہے جائز لیکن

غور اس پر بھی کریں آپ نے بویا کیا ہے

کسی معذور کا بیکس کا اڑاؤ نہ مذاق

کیا پتہ اپنے مقدر میں بھی لکھا کیا ہے

زندگی سے ہے مری لپٹی ہوئی گرد سفر

میں نے دیکھا ہے جہاں آپ نے دیکھا کیا ہے

اندھی تقلید نہ کر سوچ سمجھ دیکھ شفقؔ

رخ ہوا کا ہے کدھر وقت کا منشا کیا ہے