kya hai duniya dil-e-nadan ne samjha kya hai

kyā hai duniyā dil-e-nādān ne samjhā kyā hai

gaahe ġham gaahe ḳhushī aur yahāñ rakkhā kyā hai

sirf a.amāl haiñ insāñ kā asāsa kyā hai

chhoḌ kar jaanā hai sab kuchh yahāñ apnā kyā hai

Thokareñ khaa.ī haiñ jis ne zarā us se pūchho

tum ne dahlīz ke patthar ko bhī samjhā kyā hai

ye kyā samjheñge vafā rasm-e-mohabbat aḳhlāq

aaj ke daur ke insān ne dekhā kyā hai

phuul aur phal kī tamanna to hai jaa.ez lekin

ġhaur is par bhī kareñ aap ne boyā kyā hai

kisī ma.azūr kā bekas kā uḌaao na mazāq

kyā pata apne muqaddar meñ bhī likkhā kyā hai

zindagī se hai mirī lipTī huī gard-e-safar

maiñ ne dekhā hai jahāñ aap ne dekhā kyā hai

andhī taqlīd na kar soch samajh dekh 'shafaq'

ruḳh havā kā hai kidhar vaqt kā manshā kyā hai

kya hai duniya dil-e-nadan ne samjha kya hai

gahe gham gahe KHushi aur yahan rakkha kya hai

sirf aamal hain insan ka asasa kya hai

chhoD kar jaana hai sab kuchh yahan apna kya hai

Thokaren khai hain jis ne zara us se puchho

tum ne dahliz ke patthar ko bhi samjha kya hai

ye kya samjhenge wafa rasm-e-mohabbat aKHlaq

aaj ke daur ke insan ne dekha kya hai

phul aur phal ki tamanna to hai jaez lekin

ghaur is par bhi karen aap ne boya kya hai

kisi mazur ka bekas ka uDao na mazaq

kya pata apne muqaddar mein bhi likkha kya hai

zindagi se hai meri lipTi hui gard-e-safar

main ne dekha hai jahan aap ne dekha kya hai

andhi taqlid na kar soch samajh dekh 'shafaq'

ruKH hawa ka hai kidhar waqt ka mansha kya hai