کیا ہے ہاتھوں کی لکیروں میں بتاؤ نہ مجھے

کیا ہے ہاتھوں کی لکیروں میں بتاؤ نہ مجھے

خواب سے پہلے ہی تعبیر دکھاؤ نہ مجھے

خوب تر خواب سے کیا ہوگا کوئی بھی جلوہ

ٹوٹ جائیں نہ مرے خواب جگاؤ نہ مجھے

لو میں ہٹ جاتا ہوں رستے سے تمہارے یارو

شوق سے آگے نکل جاؤ گراؤ نہ مجھے

صرف سچ بول کے بن جائے نہ سقراط کوئی

مجھ سے کیا ڈر ہے تمہیں زہر پلاؤ نہ مجھے

شعر میرے تو ہیں بس حرف تسلی کی طرح

میں مسیحا نہیں سولی پہ چڑھاؤ نہ مجھے

اب نہ نغمہ نہ کوئی گیت ہے باقی مجھ میں

بے صدا ساز ہوں بے کار بجاؤ نہ مجھے