kya hamare shauq bhi wo kaj-ada le jaega

kyā hamāre shauq bhī vo kaj-adā le jā.egā

ham bhī jā.eñge jahāñ ab rāsta le jā.egā

yuuñ huā ki sab aqā.ed radd kar baiThā huuñ maiñ

dekhnā hai ab kahāñ shauq-e-ḳhudā le jā.egā

bosa le kar mere māthe kā kisī ne ye kahā

tū jahāñ bhī jā.egā mere havāle jā.egā

terī nādānī ye terā zo.am hai tū yaad rakh

ek hī aañsū tirī duniyā bahā le jā.egā

apnā kyā hai har nafas par ġhair kā ab aks hai

dushman-e-jānī bhī aayā to duā le jā.egā

kya hamare shauq bhi wo kaj-ada le jaega

hum bhi jaenge jahan ab rasta le jaega

yun hua ki sab aqaed radd kar baiTha hun main

dekhna hai ab kahan shauq-e-KHuda le jaega

bosa le kar mere mathe ka kisi ne ye kaha

tu jahan bhi jaega mere hawale jaega

teri nadani ye tera zoam hai tu yaad rakh

ek hi aansu teri duniya baha le jaega

apna kya hai har nafas par ghair ka ab aks hai

dushman-e-jaani bhi aaya to dua le jaega