کیا ہجر میں تسکین کی صورت نہیں رہتی

کیا ہجر میں تسکین کی صورت نہیں رہتی

رہتی ہے مگر تیری بدولت نہیں رہتی

اب جیسے کوئی کام ہی رکتا نہیں اپنا

اب جیسے کسی شے کی ضرورت نہیں رہتی

دنیا سے گزر جاتے ہیں دنیا کی طلب میں

دنیا سے ہمیں کوئی شکایت نہیں رہتی

وہ موج صد آواز بلاتی تو ہے اب بھی

مجھ کو ہی ادھر جانے کی فرصت نہیں رہتی

ناگن کی طرح رات سمٹ آتی ہے دل میں

جب سامنے اک چاند سی صورت نہیں رہتی

کہتے تھے بہت دل نہ لگا کار ہوس میں

لے دیکھ کہ اس شوق میں عزت نہیں رہتی