kya ho gaya hai tujhko mere dil sambhal sambhal

kyā ho gayā hai tujh ko mire dil sambhal sambhal

aise to paañv rakhte haiñ ġhāfil sambhal sambhal

laayā hai khīñch tum ko jahāñ zauq-e-mai-kashī

lagtī nahīñ ye dard kī mahfil sambhal sambhal

ik umr pā ke ḳhatm na ho jaa.e terā pyaar

hone lagī hai aarzū shāmil sambhal sambhal

Dūbegī rāh-e-shauq meñ le kar tujhe bhī saath

manzil hai terī raah meñ haa.il sambhal sambhal

jis nāḳhudā ko tū ne banāyā thā ham-safar

thāmā hai us ne dāman-e-sāhil sambhal-sambhal

toḌe haiñ jis ko paane kī ḳhātir hazār dil

manzil nahīñ hai dhokā hai ġhāfil sambhal sambhal

qurbān-gāh-e-gulshan-e-hastī meñ ai 'kañval'

baiThe haiñ phūl-phūl meñ qātil sambhal-sambhal

kya ho gaya hai tujh ko mere dil sambhal sambhal

aise to panw rakhte hain ghafil sambhal sambhal

laya hai khinch tum ko jahan zauq-e-mai-kashi

lagti nahin ye dard ki mahfil sambhal sambhal

ek umr pa ke KHatm na ho jae tera pyar

hone lagi hai aarzu shamil sambhal sambhal

Dubegi rah-e-shauq mein le kar tujhe bhi sath

manzil hai teri rah mein hail sambhal sambhal

jis naKHuda ko tu ne banaya tha ham-safar

thama hai us ne daman-e-sahil sambhal-sambhal

toDe hain jis ko pane ki KHatir hazar dil

manzil nahin hai dhoka hai ghafil sambhal sambhal

qurban-gah-e-gulshan-e-hasti mein ai 'kanwal'

baiThe hain phul-phul mein qatil sambhal-sambhal