kya hua markaz-e-hasti agar insan na hua

kyā huā markaz-e-hastī agar insāñ na huā

aabrū ḳhaak hai qatre kī jo tūfāñ na huā

saḳht mushkil hai ki himmat ye huī sahl-pasand

ġhair-mumkin rahā vo kaam jo āsāñ na huā

sharm bhī aatī hai ye kahte aur afsos bhī hai

aadmī yuuñ to sabhī kuchh huā insāñ na huā

jaama pahne rahā parvānoñ kī jāñ-bāzī kā

sho'la fānūs ke parde meñ bhī uryāñ na huā

kar gayā āñkhoñ ko ḳhīra vo faroġh-e-jalva

kis liye nūr-e-hudā parde meñ pinhāñ na huā

khel samjhā kiye 'ālam ke karishmoñ ko ham

dil-e-ḳhud-rafta kisī baat se hairāñ na huā

phir 'ajab kyā hai 'adam se jo huī dilchaspī

darḳhur-e-vus'at-e-dil ‘ālam-e-imkāñ na huā

haiñ mire dil meñ vo aa.heñ na baneñ jo bijlī

merī āñkhoñ meñ vo qatra hai jo tūfāñ na huā

hausla kis ko hai dil chiir ke dikhlā.ūñ kise

vo sharar is meñ hai jo sang meñ pinhāñ na huā

ġham rahā un ko jo dozaḳh meñ paḌe jalte haiñ

mere ḳhush hone kā jannat meñ bhī sāmāñ na huā

do jagah dair meñ yā daar pe tum 'kaifī' ko

kāfir-e-‘ishq kabhī dushman-e-īmāñ na huā

kya hua markaz-e-hasti agar insan na hua

aabru KHak hai qatre ki jo tufan na hua

saKHt mushkil hai ki himmat ye hui sahl-pasand

ghair-mumkin raha wo kaam jo aasan na hua

sharm bhi aati hai ye kahte aur afsos bhi hai

aadmi yun to sabhi kuchh hua insan na hua

jama pahne raha parwanon ki jaan-bazi ka

sho'la fanus ke parde mein bhi uryan na hua

kar gaya aankhon ko KHira wo farogh-e-jalwa

kis liye nur-e-huda parde mein pinhan na hua

khel samjha kiye 'alam ke karishmon ko hum

dil-e-KHud-rafta kisi baat se hairan na hua

phir 'ajab kya hai 'adam se jo hui dilchaspi

darKHur-e-wus'at-e-dil ‘alam-e-imkan na hua

hain mere dil mein wo aahen na banen jo bijli

meri aankhon mein wo qatra hai jo tufan na hua

hausla kis ko hai dil chir ke dikhlaun kise

wo sharar is mein hai jo sang mein pinhan na hua

gham raha un ko jo dozaKH mein paDe jalte hain

mere KHush hone ka jannat mein bhi saman na hua

do jagah dair mein ya dar pe tum 'kaifi' ko

kafir-e-‘ishq kabhi dushman-e-iman na hua