کیا ہوا تم کو اگر چہرے بدلنا آ گیا

کیا ہوا تم کو اگر چہرے بدلنا آ گیا

ہم کو بھی حالات کے سانچے میں ڈھلنا آ گیا

روشنی کے واسطے دھاگے کو جلتے دیکھ کر

لی نصیحت موم نے اس کو پگھلنا آ گیا

شکریہ بے حد تمہارا شکریہ اے پتھرو

سر جھکا کر جو مجھے رستے پہ چلنا آ گیا

سر پھری آندھی سے اس کی دوستی کیا ہو گئی

دھول کو انسان کے سر تک اچھلنا آ گیا

بچھ گئے پھر خودبخود رستوں میں کتنے ہی گلاب

جب ہمیں کانٹوں پہ ننگے پاؤں چلنا آ گیا

چاند کو چھونے کی کوشش میں تو ناکامی ملی

ہاں مگر نادان بچہ کو اچھلنا آ گیا

پہلے بچپن پھر جوانی پھر بڑھاپے کے نشان

عمر کو بھی دیکھیے کپڑے بدلنا آ گیا