kya hua tumko agar chehre badalna aa gaya

kyā huā tum ko agar chehre badalnā aa gayā

ham ko bhī hālāt ke sāñche meñ Dhalnā aa gayā

raushnī ke vāste dhāge ko jalte dekh kar

lī nasīhat mom ne us ko pighalnā aa gayā

shukriya behad tumhārā shukriya ai pattharo

sar jhukā kar jo mujhe raste pe chalnā aa gayā

sar-phirī āñdhī se us kī dostī kyā ho ga.ī

dhuul ko insān ke sar tak uchhalnā aa gayā

bichh ga.e phir ḳhud-ba-ḳhud rastoñ meñ kitne hī gulāb

jab hameñ kāñToñ pe nange paañv chalnā aa gayā

chāñd ko chhūne kī koshish meñ to nākāmī milī

haañ magar nādān bachche ko uchhalnā aa gayā

pahle bachpan phir javānī phir buḌhāpe ke nishān

'umr ko bhī dekhiye kapḌe badalnā aa gayā

kya hua tum ko agar chehre badalna aa gaya

hum ko bhi haalat ke sanche mein Dhalna aa gaya

raushni ke waste dhage ko jalte dekh kar

li nasihat mom ne us ko pighalna aa gaya

shukriya behad tumhaara shukriya ai pattharo

sar jhuka kar jo mujhe raste pe chalna aa gaya

sar-phiri aandhi se us ki dosti kya ho gai

dhul ko insan ke sar tak uchhalna aa gaya

bichh gae phir KHud-ba-KHud raston mein kitne hi gulab

jab hamein kanTon pe nange panw chalna aa gaya

chand ko chhune ki koshish mein to nakaami mili

han magar nadan bachche ko uchhalna aa gaya

pahle bachpan phir jawani phir buDhape ke nishan

'umr ko bhi dekhiye kapDe badalna aa gaya