kya hue aashufta-karan kya hue

kyā hue āshufta-kārāñ kyā hue

yād-e-yārāñ yār-e-yārāñ kyā hue

ab to apnoñ meñ se koī bhī nahīñ

vo pareshāñ rozgārāñ kyā hue

so rahā hai shaam hī se shahr-e-dil

shahr ke shab-zinda-dārāñ kyā hue

us kī chashm-e-nīm-vā se pūchhiyo

vo tire mizhgāñ-shumārāñ kyā hue

ai bahār-e-intizār-e-fasl-e-gul

vo garebāñ-tār-tārāñ kyā hue

kyā hue sūrat-nigārāñ ḳhvāb ke

ḳhvāb ke sūrat-nigārāñ kyā hue

yaad us kī ho ga.ī hai be-amāñ

yaad ke be-yādgārāñ kyā hue

kya hue aashufta-karan kya hue

yaad-e-yaran yar-e-yaran kya hue

ab to apnon mein se koi bhi nahin

wo pareshan rozgaran kya hue

so raha hai sham hi se shahr-e-dil

shahr ke shab-zinda-daran kya hue

us ki chashm-e-nim-wa se puchhiyo

wo tere mizhgan-shumaran kya hue

ai bahaar-e-intizar-e-fasl-e-gul

wo gareban-tar-taran kya hue

kya hue surat-nigaran KHwab ke

KHwab ke surat-nigaran kya hue

yaad us ki ho gai hai be-aman

yaad ke be-yaadgaran kya hue