kya irada hai mere yar kahan jata hai

kyā irāda hai mire yaar kahāñ jaatā hai

tez itnī hai jo raftār kahāñ jaatā hai

terī manzil to kisī aur taraf hai aur tū

ai mire qāfila-sālār kahāñ jaatā hai

aa zarā der kahīñ baiTh ke bāteñ kar leñ

chhoḌ bāzār ko bāzār kahāñ jaatā hai

phirtā rahtā hai mazāfāt meñ tere din-rāt

duur ab terā giraftār kahāñ jaatā hai

tere chehre kī chamak bol rahī hai ḳhud hī

is qadar ho ke ye tayyār kahāñ jaatā hai

pahle mumkin thā magar ab ye nahīñ hai mumkin

ab mire dil kā ye āzār kahāñ jaatā hai

maiñ chhupā.ūñ bhī to ye baat kahāñ chhuptī hai

sab ko ma.alūm hai bīmār kahāñ jaatā hai

kār-e-duniyā bhī nahīñ hai ye faqīrī bhī nahīñ

be-niyāz-e-kam-o-bisyār kahāñ jaatā hai

ye tire chalne kā andāz nahīñ hai bilkul

terā jaanā hai pur-asrār kahāñ jaatā hai

us kī taqdīr meñ likkhā hai jahāñ hai vahīñ ho

kisī jānib koī kohsār kahāñ jaatā hai

hai tujhe dhuup meñ jalne kā bahut shauq 'hanīf'

chhoḌ kar sāya-e-dīvār kahāñ jaatā hai

kya irada hai mere yar kahan jata hai

tez itni hai jo raftar kahan jata hai

teri manzil to kisi aur taraf hai aur tu

ai mere qafila-salar kahan jata hai

aa zara der kahin baiTh ke baaten kar len

chhoD bazar ko bazar kahan jata hai

phirta rahta hai mazafat mein tere din-raat

dur ab tera giraftar kahan jata hai

tere chehre ki chamak bol rahi hai KHud hi

is qadar ho ke ye tayyar kahan jata hai

pahle mumkin tha magar ab ye nahin hai mumkin

ab mere dil ka ye aazar kahan jata hai

main chhupaun bhi to ye baat kahan chhupti hai

sab ko malum hai bimar kahan jata hai

kar-e-duniya bhi nahin hai ye faqiri bhi nahin

be-niyaz-e-kam-o-bisyar kahan jata hai

ye tere chalne ka andaz nahin hai bilkul

tera jaana hai pur-asrar kahan jata hai

us ki taqdir mein likkha hai jahan hai wahin ho

kisi jaanib koi kohsar kahan jata hai

hai tujhe dhup mein jalne ka bahut shauq 'hanif'

chhoD kar saya-e-diwar kahan jata hai