kya ishq hai jab ho jaega tab baat samajh mein aaegi

kyā ishq hai jab ho jā.egā tab baat samajh meñ aa.egī

jab zehn ko dil samjhā.egā tab baat samajh meñ aa.egī

pal meñ ḳhush pal meñ ranjīda aa.e na samajh meñ baat hai kyā

dil khil khil kar murjhā.egā tab baat samajh meñ aa.egī

gum-sum rahne kā kyā hai sabab hañstā hai akele meñ koī kab

jab koī dil ko churā.egā tab baat samajh meñ aa.egī

maiñ auroñ ko samjhātā thā ai ishq mujhe mālūm na thā

jab kuchh na samajh meñ aa.egā tab baat samajh meñ aa.egī

kyā aafat dil kā aana hai be-sūd abhī samjhānā hai

dil taḌpegā taḌpā.egā tab baat samajh meñ aa.egī

chhup-chhup kar dil kyoñ rotā hai kyā ālam-e-vahshat hotā hai

rah-rah kar jī ghabrā.egā tab baat samajh meñ aa.egī

kyā shai hai mohabbat kī ḳhushbū aatā hai nazar koī kyoñ har sū

āñkhoñ meñ koī bas jā.egā tab baat samajh meñ aa.egī

'rāġhib' mat pūchh hai raġhbat kyā iz.hār mohabbat kyā hai balā

ik lafz na muñh tak aa.egā tab baat samajh meñ aa.egī

kya ishq hai jab ho jaega tab baat samajh mein aaegi

jab zehn ko dil samjhaega tab baat samajh mein aaegi

pal mein KHush pal mein ranjida aae na samajh mein baat hai kya

dil khil khil kar murjhaega tab baat samajh mein aaegi

gum-sum rahne ka kya hai sabab hansta hai akele mein koi kab

jab koi dil ko churaega tab baat samajh mein aaegi

main auron ko samjhata tha ai ishq mujhe malum na tha

jab kuchh na samajh mein aaega tab baat samajh mein aaegi

kya aafat dil ka aana hai be-sud abhi samjhana hai

dil taDpega taDpaega tab baat samajh mein aaegi

chhup-chhup kar dil kyon rota hai kya aalam-e-wahshat hota hai

rah-rah kar ji ghabraega tab baat samajh mein aaegi

kya shai hai mohabbat ki KHushbu aata hai nazar koi kyon har su

aankhon mein koi bas jaega tab baat samajh mein aaegi

'raghib' mat puchh hai raghbat kya izhaar mohabbat kya hai bala

ek lafz na munh tak aaega tab baat samajh mein aaegi