kya ishq tha jo bais-e-ruswai ban gaya

kyā ishq thā jo bā.is-e-rusvā.ī ban gayā

yaaro tamām shahr tamāshā.ī ban gayā

bin māñge mil ga.e mirī āñkhoñ ko ratjage

maiñ jab se ek chāñd kā shaidā.ī ban gayā

dekhā jo us kā dast-e-hinā.ī qarīb se

ehsās gūñjtī huī shahnā.ī ban gayā

barham huā thā merī kisī baat par koī

vo hādisa hī vaj.h-e-shanāsā.ī ban gayā

paayā na jab kisī meñ bhī āvārgī kā shauq

sahrā simaT ke gosha-e-tanhā.ī ban gayā

thā be-qarār vo mire aane se pesh-tar

dekhā mujhe to paikar-e-dānā.ī ban gayā

kartā rahā jo roz mujhe us se bad-gumāñ

vo shaḳhs bhī ab us kā tamannā.ī ban gayā

vo terī bhī to pahlī mohabbat na thī 'qatīl'

phir kyā huā agar koī harjā.ī ban gayā

kya ishq tha jo bais-e-ruswai ban gaya

yaro tamam shahr tamashai ban gaya

bin mange mil gae meri aankhon ko ratjage

main jab se ek chand ka shaidai ban gaya

dekha jo us ka dast-e-hinai qarib se

ehsas gunjti hui shahnai ban gaya

barham hua tha meri kisi baat par koi

wo hadisa hi wajh-e-shanasai ban gaya

paya na jab kisi mein bhi aawargi ka shauq

sahra simaT ke gosha-e-tanhai ban gaya

tha be-qarar wo mere aane se pesh-tar

dekha mujhe to paikar-e-danai ban gaya

karta raha jo roz mujhe us se bad-guman

wo shaKHs bhi ab us ka tamannai ban gaya

wo teri bhi to pahli mohabbat na thi 'qatil'

phir kya hua agar koi harjai ban gaya