kya isi taur hi ye sara safar jaana hai

kyā isī taur hī ye saarā safar jaanā hai

kyā kahīñ ruknā nahīñ yuuñ hī guzar jaanā hai

maiñ tire ruuh kā āshiq huuñ magar jāntā huuñ

terā ye shoḳh badan bhī mire sar jaanā hai

dasht kī ḳhaak huuñ maiñ merā kahāñ ḳhud kā safar

tai karegī ye havā mujh ko kidhar jaanā hai

shart ye thī ki na bichhaḌeñge kabhī jiite jī

ye nahīñ thī ki bichhaḌ jaa.eñ to mar jaanā hai

ab rah-e-ishq meñ ham kho bhī agar jaa.eñ to kyā

kis ko is dasht se phir lauT ke ghar jaanā hai

vo tumheñ yaad karā.egā purānī bāteñ

ai dil-e-sāda tumheñ saaf mukar jaanā hai

ye mirā pahlā safar thā so bhaTaknā hī paḌā

kaun ye mujh ko batātā ke kidhar jaanā hai

bas kisī tarah tumheñ paar karā deñ ik baar

phir safīnoñ ko samundar meñ utar jaanā hai

kya isi taur hi ye sara safar jaana hai

kya kahin rukna nahin yun hi guzar jaana hai

main tere ruh ka aashiq hun magar jaanta hun

tera ye shoKH badan bhi mere sar jaana hai

dasht ki KHak hun main mera kahan KHud ka safar

tai karegi ye hawa mujh ko kidhar jaana hai

shart ye thi ki na bichhaDenge kabhi jite ji

ye nahin thi ki bichhaD jaen to mar jaana hai

ab rah-e-ishq mein hum kho bhi agar jaen to kya

kis ko is dasht se phir lauT ke ghar jaana hai

wo tumhein yaad karaega purani baaten

ai dil-e-sada tumhein saf mukar jaana hai

ye mera pahla safar tha so bhaTakna hi paDa

kaun ye mujh ko batata ke kidhar jaana hai

bas kisi tarah tumhein par kara den ek bar

phir safinon ko samundar mein utar jaana hai