kya jaane kya tumne socha kuchh to aaKHir socha hoga

kyā jaane kyā tum ne sochā kuchh to āḳhir sochā hogā

ham ne to ye soch liyā hai jo bhī hogā achchhā hogā

āvāra sā phirtā thā jo ek jagah kab Thahrā hogā

kyā jaane kis āñgan meñ vo abr kā TukḌā barsā hogā

ho ke ḳhafā pahle to us ne rasm-e-vafā ko toḌā hogā

dil ke hāthoñ bebas ho kar phir mujh ko ḳhat likkhā hogā

apne chhoTe se kamre meñ khoyā khoyā tanhā tanhā

yaad kisī kī aatī hogī chupke chupke rotā hogā

aa.ina dil kā TukḌe TukḌe aks-e-tamannā bikhre bikhre

āḳhir aisā kaun aayā thā jis ne patthar pheñkā hogā

jis ne sab kī pyaas bujhā.ī pyaas na us kī samjhā koī

vo to ik aisā dariyā thā sadiyoñ se jo pyāsā hogā

bām-o-dar haiñ mahke mahke chāroñ taraf ḳhushbū ke Dere

shāyad aayā hogā 'nazar' vo ghar yūñhī kab mahkā hogā

kya jaane kya tum ne socha kuchh to aaKHir socha hoga

hum ne to ye soch liya hai jo bhi hoga achchha hoga

aawara sa phirta tha jo ek jagah kab Thahra hoga

kya jaane kis aangan mein wo abr ka TukDa barsa hoga

ho ke KHafa pahle to us ne rasm-e-wafa ko toDa hoga

dil ke hathon bebas ho kar phir mujh ko KHat likkha hoga

apne chhoTe se kamre mein khoya khoya tanha tanha

yaad kisi ki aati hogi chupke chupke rota hoga

aaina dil ka TukDe TukDe aks-e-tamanna bikhre bikhre

aaKHir aisa kaun aaya tha jis ne patthar phenka hoga

jis ne sab ki pyas bujhai pyas na us ki samjha koi

wo to ek aisa dariya tha sadiyon se jo pyasa hoga

baam-o-dar hain mahke mahke chaaron taraf KHushbu ke Dere

shayad aaya hoga 'nazar' wo ghar yunhi kab mahka hoga