kya kaam unhen pursish-e-arbab-e-wafa se

kyā kaam unheñ pursish-e-arbāb-e-vafā se

martā hai to mar jaa.e koī un kī balā se

mujh se bhī ḳhafā ho mirī aahoñ se bhī barham

tum bhī ho ajab chiiz ki laḌte ho havā se

dāman ko bachātā hai vo kāfir ki mabādā

chhū jaa.e kahīñ pāki-e-ḳhūn-e-shohdā se

dīvāna kiyā sāqi-e-mahfil ne sabhī ko

koī na bachā us nazar-e-hosh-rubā se

ik ye bhī haqīqat meñ hai shān-e-karam un kī

zāhir meñ vo rahte haiñ jo har vaqt ḳhafā se

āgāh-e-ġham-e-ishq nahīñ vo shah-e-ḳhūbāñ

aur ye bhī jo ho jaa.e faqīroñ kī duā se

qaa.il hue rindān-e-ḳharābāt ke 'hasrat'

jab kuchh na milā ham ko giroh-e-urfā se

kya kaam unhen pursish-e-arbab-e-wafa se

marta hai to mar jae koi un ki bala se

mujh se bhi KHafa ho meri aahon se bhi barham

tum bhi ho ajab chiz ki laDte ho hawa se

daman ko bachata hai wo kafir ki mabaada

chhu jae kahin paki-e-KHun-e-shohda se

diwana kiya saqi-e-mahfil ne sabhi ko

koi na bacha us nazar-e-hosh-ruba se

ek ye bhi haqiqat mein hai shan-e-karam un ki

zahir mein wo rahte hain jo har waqt KHafa se

aagah-e-gham-e-ishq nahin wo shah-e-KHuban

aur ye bhi jo ho jae faqiron ki dua se

qail hue rindan-e-KHarabaat ke 'hasrat'

jab kuchh na mila hum ko giroh-e-urfa se