kya kasa-e-mai lijiye us bazm mein ai ham-nashin

kyā kāsa-e-mai lījiye us bazm meñ ai ham-nashīñ

daur-e-falak se kyā ḳhabar pahuñchegā lab tak yā nahīñ

ye kāsa-e-fīroz-gūñ hai shīsha-bāz-e-pur-funūñ

jitne hiyal haiñ aur fusūñ sab is ke haiñ zer-e-nagīñ

ho e'timād us kā kise hai shīsha-bāzī yaad use

rakhtā hai shaad ik dam jise kartā hai phir andoh-gīñ

kal dāman-e-sahrā meñ ham guzre jo vaqt-e-sub.h-dam

ik kāsa-e-sar pur-alam aayā nazar apne vahīñ

bolā ba-fariyād-o-fuġhāñ kyā dekhtā hai o miyāñ

the ham bhī sar-bar āsmāñ go ab to haiñ zer-e-zamīñ

gul-barg se nāzuk badan sar paañv se rashk-e-chaman

zarrīñ-o-sīmīñ pairahan dilkash makānoñ ke makīñ

din-rāt nāz-o-ne.amateñ mah-tal.atoñ kī sohbateñ

aish-o-nashāt-o-ishrateñ saaqī qirāñ mutrib qarīñ

bāġh-o-chaman pesh-e-nazar bazm-e-tarab shām-o-sahar

har sū ba-kasrat jalva-gar husn-e-butān-e-nāznīñ

ek āsmāñ ke daur se ik gardish-e-fil-faur se

ab sochiyegā ġhaur se dar lahza aañ dar lahza iiñ

sunte hī jī tharrā gayā ruḳhsār par ashk aa gayā

dil ibratoñ se chhā gayā ḳhātir huī bas sahmgīñ

is meñ sar apnā nā-gahāñ har mū huā misl-e-zabāñ

bolā 'nazīr' aagah ho haañ man niiz roze ham-chunīñ

kya kasa-e-mai lijiye us bazm mein ai ham-nashin

daur-e-falak se kya KHabar pahunchega lab tak ya nahin

ye kasa-e-firoz-gun hai shisha-baz-e-pur-funun

jitne hiyal hain aur fusun sab is ke hain zer-e-nagin

ho e'timad us ka kise hai shisha-bazi yaad use

rakhta hai shad ek dam jise karta hai phir andoh-gin

kal daman-e-sahra mein hum guzre jo waqt-e-subh-dam

ek kasa-e-sar pur-alam aaya nazar apne wahin

bola ba-fariyaad-o-fughan kya dekhta hai o miyan

the hum bhi sar-bar aasman go ab to hain zer-e-zamin

gul-barg se nazuk badan sar panw se rashk-e-chaman

zarrin-o-simin pairahan dilkash makanon ke makin

din-raat naz-o-neamaten mah-talaton ki sohbaten

aish-o-nashat-o-ishraten saqi qiran mutrib qarin

bagh-o-chaman pesh-e-nazar bazm-e-tarab sham-o-sahar

har su ba-kasrat jalwa-gar husn-e-butan-e-naznin

ek aasman ke daur se ek gardish-e-fil-faur se

ab sochiyega ghaur se dar lahza aan dar lahza in

sunte hi ji tharra gaya ruKHsar par ashk aa gaya

dil ibraton se chha gaya KHatir hui bas sahmgin

is mein sar apna na-gahan har mu hua misl-e-zaban

bola 'nazir' aagah ho han man niz roze ham-chunin