kya kahen aalam-e-shabab ki baat

kyā kaheñ ālam-e-shabāb kī baat

mo'atabar hotī kab hai ḳhvāb kī baat

jhaḌ ga.ī sheḳhī abr kī jis dam

chal paḌī dīda-e-pur-āb kī baat

diije dam us ko hazrat-e-nāseh

jāntā jo na ho janāb kī baat

hai ye aur aah us kā kūcha hai

kyā kahūñ is dil-e-ḳharāb kī baat

laakh parda kiyā magar na chhupī

aah majnūn-e-dil-kabāb kī baat

rañg hai zard muñh pe ḳhushkī hai

muñh se nikle hai pech-o-tāb kī baat

aaj kuchh be-qarār se ho tum

kahīñ chhuptī hai iztirāb kī baat

chal paḌī bazm-e-mai-kashāñ meñ jab

nigah-e-chashm-e-mast-ḳhvāb kī baat

ho ga.e bas nashe haran sab ke

na rahī ḳhaak kuchh sharāb kī baat

sach kaho kis se dil lagā hai 'aish'

nahīñ yāroñ se ye hijāb kī baat

kya kahen aalam-e-shabab ki baat

mo'atabar hoti kab hai KHwab ki baat

jhaD gai sheKHi abr ki jis dam

chal paDi dida-e-pur-ab ki baat

dije dam us ko hazrat-e-naseh

jaanta jo na ho janab ki baat

hai ye aur aah us ka kucha hai

kya kahun is dil-e-KHarab ki baat

lakh parda kiya magar na chhupi

aah majnun-e-dil-kabab ki baat

rang hai zard munh pe KHushki hai

munh se nikle hai pech-o-tab ki baat

aaj kuchh be-qarar se ho tum

kahin chhupti hai iztirab ki baat

chal paDi bazm-e-mai-kashan mein jab

nigah-e-chashm-e-mast-KHwab ki baat

ho gae bas nashe haran sab ke

na rahi KHak kuchh sharab ki baat

sach kaho kis se dil laga hai 'aish'

nahin yaron se ye hijab ki baat