kya kahen kis se kahen ranjish-o-afat ka gham

kyā kaheñ kis se kaheñ ranjish-o-āfāt kā ġham

ab sahā jaatā nahīñ gardish-e-hālāt kā ġham

har ghaḌī sho.ale baraste the badan par mere

kaise maiñ bhūltā guzre hue lamhāt kā ġham

ḳhvāb bhī TuuT ga.e dil bhī mirā TuuT gayā

umr bhar mujh ko rahā un se mulāqāt kā ġham

maiñ ḳhushī pahlī sī ai dost kahāñ se lā.ūñ

ab to har vaqt mire pīchhe hai ḳhadshāt kā ġham

aaj bhī zinda huuñ maiñ ban ke ujāloñ kā safīr

apnī āñkhoñ meñ samo.e hue zulmāt kā ġham

thak ga.ī merī zabāñ karke duā bhī 'saifī'

kam huā phir bhī kahāñ arz-o-samāvāt kā ġham

kya kahen kis se kahen ranjish-o-afat ka gham

ab saha jata nahin gardish-e-haalat ka gham

har ghaDi shoale baraste the badan par mere

kaise main bhulta guzre hue lamhat ka gham

KHwab bhi TuT gae dil bhi mera TuT gaya

umr bhar mujh ko raha un se mulaqat ka gham

main KHushi pahli si ai dost kahan se laun

ab to har waqt mere pichhe hai KHadshat ka gham

aaj bhi zinda hun main ban ke ujalon ka safir

apni aankhon mein samoe hue zulmat ka gham

thak gai meri zaban karke dua bhi 'saifi'

kam hua phir bhi kahan arz-o-samawat ka gham