kya kahiye kaTi hijr ki kyunkar tamam raat

kyā kahiye kaaTī hijr kī kyūñkar tamām raat

āh-e-jigar-gudāz thī lab par tamām raat

aaya na karke va.ada jo dilbar tamām raat

betāb dil thā jaan thī muztar tamām raat

vo mahv-e-ḳhvāb-e-nāz jo bālā-e-bām the

niklā na sharm se mah-e-anvar tamām raat

ārā.ishoñ kā shauq yahī hai to aa chuke

bantī rahegī zulf-e-mo.ambar tamām raat

sone diyā na us but-e-ġhaflat-shi.ār ko

afsāna dard-e-dil kā sunā kar tamām raat

bedāriyāñ na pūchhiye ham ḳhufta-baḳht kī

kaaTī hai yūñhī jaag ke aksar tamām raat

Thankā na un kā māthā na chauñke vo niiñd se

dar par paTaktā rah gayā maiñ sar tamām raat

āñkhoñ meñ maiñ ne sub.h shab-e-intizār kī

gintā rahā huuñ baiTh ke aḳhtar tamām raat

mizhgāñ kī yaad thī jo shab-e-hijr-e-yār meñ

chubhtā rahā hai siine meñ nashtar tamām raat

betāb kar rahī haiñ tirī be-qarāriyāñ

taḌpā karegā kyā dil-e-muztar tamām raat

allah re zo.af uf rī ġhashī hijr-e-yār meñ

murda sā thā paḌā sar-e-bistar tamām raat

gesū kī yaad aur shab-e-tār hijr kī

kaalī balā savār thī sar par tamām raat

surma lagā rahā hai fusūñ-sāz aañkh meñ

jaadū jagā.egā vo fusūñ-gar tamām raat

bhar diiñ haiñ hijr-e-yār ne rag-rag meñ bijliyāñ

taḌpūñ na shakl-e-barq maiñ kyūñkar tamām raat

thī yaad meñ jo sāqī-e-kausar kī chashm-e-mast

piitā rahā huuñ bāda-e-at.har tamām raat

sajda maiñ shukr kā karūñ ai 'badr' vaqt-e-sub.h

daulat jo vasl kī ho mayassar tamām raat

kya kahiye kaTi hijr ki kyunkar tamam raat

aah-e-jigar-gudaz thi lab par tamam raat

aaya na karke wada jo dilbar tamam raat

betab dil tha jaan thi muztar tamam raat

wo mahw-e-KHwab-e-naz jo baala-e-baam the

nikla na sharm se mah-e-anwar tamam raat

aaraishon ka shauq yahi hai to aa chuke

banti rahegi zulf-e-moambar tamam raat

sone diya na us but-e-ghaflat-shiar ko

afsana dard-e-dil ka suna kar tamam raat

bedariyan na puchhiye hum KHufta-baKHt ki

kaTi hai yunhi jag ke aksar tamam raat

Thanka na un ka matha na chaunke wo nind se

dar par paTakta rah gaya main sar tamam raat

aankhon mein main ne subh shab-e-intizar ki

ginta raha hun baiTh ke aKHtar tamam raat

mizhgan ki yaad thi jo shab-e-hijr-e-yar mein

chubhta raha hai sine mein nashtar tamam raat

betab kar rahi hain teri be-qarariyan

taDpa karega kya dil-e-muztar tamam raat

allah re zoaf uf ri ghashi hijr-e-yar mein

murda sa tha paDa sar-e-bistar tamam raat

gesu ki yaad aur shab-e-tar hijr ki

kali bala sawar thi sar par tamam raat

surma laga raha hai fusun-saz aankh mein

jadu jagaega wo fusun-gar tamam raat

bhar din hain hijr-e-yar ne rag-rag mein bijliyan

taDpun na shakl-e-barq main kyunkar tamam raat

thi yaad mein jo saqi-e-kausar ki chashm-e-mast

pita raha hun baada-e-athar tamam raat

sajda main shukr ka karun ai 'badr' waqt-e-subh

daulat jo wasl ki ho mayassar tamam raat