kya kahun kis se kahun kahne ka kuchh hasil nahin

kyā kahūñ kis se kahūñ kahne kā kuchh hāsil nahīñ

jab se dekhā hai unheñ qaabū meñ merā dil nahīñ

lutf kyā piine kā aa.egā bhalā ai mai-kasho

mai to hai maujūd lekin sāqi-e-mahfil nahīñ

tere aane se vo kyā mahfūz ho ai fasl-e-gul

jis ko duniyā meñ mayassar hī sukūn-e-dil nahīñ

merī gardan par chhurī ye kah kar us ne pher dī

mujrim-e-ulfat kabhī bhī rahm ke qābil nahīñ

maiñ ne kis kis se nahīñ pūchhā patā terā ai dost

umr bhar DhūñDā magar mujh ko milī manzil nahīñ

hūr-e-jannat kī tamanna dil meñ rakhte haiñ magar

shaiḳh jī kā qaul hai ulfat kā maiñ qaa.il nahīñ

jitnā tum chāho karo zulm-o-sitam mujh par magar

munharif ho jaa.e tum se aisā merā dil nahīñ

mujh ko bhī sāġhar mile ai sāqī-e-rangīn-adā

mujh pe bhī chashm-e-karam ho kyā maiñ is qābil nahīñ

bhūlne vaale faqat itnā batānā hai tujhe

terā 'ahmar' yaad se terī kabhī ġhāfil nahīñ

kya kahun kis se kahun kahne ka kuchh hasil nahin

jab se dekha hai unhen qabu mein mera dil nahin

lutf kya pine ka aaega bhala ai mai-kasho

mai to hai maujud lekin saqi-e-mahfil nahin

tere aane se wo kya mahfuz ho ai fasl-e-gul

jis ko duniya mein mayassar hi sukun-e-dil nahin

meri gardan par chhuri ye kah kar us ne pher di

mujrim-e-ulfat kabhi bhi rahm ke qabil nahin

main ne kis kis se nahin puchha pata tera ai dost

umr bhar DhunDa magar mujh ko mili manzil nahin

hur-e-jannat ki tamanna dil mein rakhte hain magar

shaiKH ji ka qaul hai ulfat ka main qail nahin

jitna tum chaho karo zulm-o-sitam mujh par magar

munharif ho jae tum se aisa mera dil nahin

mujh ko bhi saghar mile ai saqi-e-rangin-ada

mujh pe bhi chashm-e-karam ho kya main is qabil nahin

bhulne wale faqat itna batana hai tujhe

tera 'ahmar' yaad se teri kabhi ghafil nahin