kya kahun mujh pe jo ai dushman-e-jaan guzri hai

kyā kahūñ mujh pe jo ai dushman-e-jāñ guzrī hai

tirī har baat tabī.at pe girāñ guzrī hai

kuchh na samjhegā tū betābī-e-dil kā aalam

ye musībat kī ghaḌī tujh pe kahāñ guzrī hai

naunihālān-e-chaman bhī ḳhas-o-ḳhāshāk hue

ḳhaak uḌātī huī yuuñ bād-e-ḳhizāñ guzrī hai

zindagī naġhma-e-be-sāz-o-navā thī pahle

aaj tak ḳhair se ai dard-e-nihāñ guzrī hai

jāda-e-shauq meñ ye bhī mujhe ma.alūm nahīñ

din kahāñ biit gayā raat kahāñ guzrī hai

ziist vo kyā hai jo mauhūm sī ummīd liye

maut kī raah se benām-o-nishāñ guzrī hai

dekhiye rañg jamātī hai bahār ab kyoñ kar

luuT kar husn-e-gulistāñ ko ḳhizāñ guzrī hai

jur.at-e-arz-e-tamannā mujhe kyoñ kar ho 'kañval'

ḳhātir-e-husn pe har baat girāñ guzrī hai

kya kahun mujh pe jo ai dushman-e-jaan guzri hai

teri har baat tabiat pe giran guzri hai

kuchh na samjhega tu betabi-e-dil ka aalam

ye musibat ki ghaDi tujh pe kahan guzri hai

naunihaalan-e-chaman bhi KHas-o-KHashak hue

KHak uDati hui yun baad-e-KHizan guzri hai

zindagi naghma-e-be-saz-o-nawa thi pahle

aaj tak KHair se ai dard-e-nihan guzri hai

jada-e-shauq mein ye bhi mujhe malum nahin

din kahan bit gaya raat kahan guzri hai

zist wo kya hai jo mauhum si ummid liye

maut ki rah se benam-o-nishan guzri hai

dekhiye rang jamati hai bahaar ab kyon kar

luT kar husn-e-gulistan ko KHizan guzri hai

jurat-e-arz-e-tamanna mujhe kyon kar ho 'kanwal'

KHatir-e-husn pe har baat giran guzri hai