کیا کہوں مجھ پہ جو اے دشمن جاں گزری ہے

کیا کہوں مجھ پہ جو اے دشمن جاں گزری ہے

تری ہر بات طبیعت پہ گراں گزری ہے

کچھ نہ سمجھے گا تو بیتابیٔ دل کا عالم

یہ مصیبت کی گھڑی تجھ پہ کہاں گزری ہے

نونہالان چمن بھی خس و خاشاک ہوئے

خاک اڑاتی ہوئی یوں باد خزاں گزری ہے

زندگی نغمۂ بے ساز و نوا تھی پہلے

آج تک خیر سے اے درد نہاں گزری ہے

جادۂ شوق میں یہ بھی مجھے معلوم نہیں

دن کہاں بیت گیا رات کہاں گزری ہے

زیست وہ کیا ہے جو موہوم سی امید لیے

موت کی راہ سے بے نام و نشاں گزری ہے

دیکھیے رنگ جماتی ہے بہار اب کیوں کر

لوٹ کر حسن گلستاں کو خزاں گزری ہے

جرأت عرض تمنا مجھے کیوں کر ہو کنولؔ

خاطر حسن پہ ہر بات گراں گزری ہے