کیا کرے چشم غلط انداز بے تقصیر ہے

کیا کرے چشم غلط انداز بے تقصیر ہے

اے شہ خوباں کماں بھاری ہے ہلکا تیر ہے

میرا منہ چھوٹا بڑی باتوں میں کیوں کر دخل دوں

سامنے تصویر یوسف کے تری تصویر ہے

کل نہ تھی ملنے کی فرصت آج وہ گھر پر نہیں

دیکھ اے تدبیر کے حامی یہی تقدیر ہے

میں بھی دل رکھتا ہوں کیا مجھ کو نہیں شوق حرم

خاک بت خانے کی لیکن پاؤں کی زنجیر ہے

عکس ہے پھر عکس آئینے سے اتنا ربط کیا

اصل سے بہتر ہے میرے دل میں جو تصویر ہے

آنکھ کے اندر نگاہ ناز ہے کتنی غریب

آنکھ سے باہر یہی چلتی ہوئی شمشیر ہے

صدقؔ سچ پوچھو تو پوجا حسن ہی کی ہے بجا

لب کشائی میں خدا کا خوف دامن گیر ہے