kya kare chashm-e-ghalat-andaz be-taqsir hai

kyā kare chashm-e-ġhalat-andāz be-taqsīr hai

ai shah-e-ḳhūbāñ kamāñ bhārī hai halkā tiir hai

merā muñh chhoTā baḌī bātoñ meñ kyūñkar daḳhl duuñ

sāmne tasvīr-e-yūsuf ke tirī tasvīr hai

kal na thī milne kī fursat aaj vo ghar par nahīñ

dekh ai tadbīr ke haamī yahī taqdīr hai

maiñ bhī dil rakhtā huuñ kyā mujh ko nahīñ shauq-e-haram

ḳhaak but-ḳhāne kī lekin paañv kī zanjīr hai

'aks hai phir 'aks ā.īne se itnā rabt kyā

asl se behtar hai mere dil meñ jo tasvīr hai

aañkh ke andar nigāh-e-nāz hai kitnī ġharīb

aañkh se bāhar yahī chaltī huī shamshīr hai

'sidq' sach pūchho to puujā husn hī kī hai bajā

lab-kushā.ī meñ ḳhudā kā ḳhauf dāman-gīr hai

kya kare chashm-e-ghalat-andaz be-taqsir hai

ai shah-e-KHuban kaman bhaari hai halka tir hai

mera munh chhoTa baDi baaton mein kyunkar daKHl dun

samne taswir-e-yusuf ke teri taswir hai

kal na thi milne ki fursat aaj wo ghar par nahin

dekh ai tadbir ke hami yahi taqdir hai

main bhi dil rakhta hun kya mujh ko nahin shauq-e-haram

KHak but-KHane ki lekin panw ki zanjir hai

'aks hai phir 'aks aaine se itna rabt kya

asl se behtar hai mere dil mein jo taswir hai

aankh ke andar nigah-e-naz hai kitni gharib

aankh se bahar yahi chalti hui shamshir hai

'sidq' sach puchho to puja husn hi ki hai baja

lab-kushai mein KHuda ka KHauf daman-gir hai