kya karen gulshan pe joban zer-e-dam aaya to kya

kyā kareñ gulshan pe joban zer-e-dām aayā to kyā

kyā tavaqqo inqalāb-e-nau nizām aayā to kyā

ab ye tāsīr-e-mohabbat par qasīda kyā zarūr

jazba-e-be-tābī-e-dil thā jo kaam aayā to kyā

aañkh se dil kī taraf dauḌe vo mai piite haiñ ham

ham vo mai-kash haiñ ki saaqī le ke jaam aayā to kyā

zo.af apnā toḌne detā hai zanjīreñ kahīñ

ham meñ dam kyā hai jo vaqt-e-intiqām aayā to kyā

maiñ samajhtā huuñ use āġhāz-e-mustaqbil-fazā

aap kahte haiñ koī bālā-e-bām aayā to kyā

ab vo iz.hār-e-haqīqat ke liye Darte nahīñ

ab vo kahte haiñ ḳhat us kā mere naam aayā to kyā

hai to nā-ehsāñ-shanāsī 'shād' lekin kyā karūñ

kaam ban saktā thā yuuñ bhī koī kaam aayā to kyā

kya karen gulshan pe joban zer-e-dam aaya to kya

kya tawaqqo inqalab-e-nau nizam aaya to kya

ab ye tasir-e-mohabbat par qasida kya zarur

jazba-e-be-tabi-e-dil tha jo kaam aaya to kya

aankh se dil ki taraf dauDe wo mai pite hain hum

hum wo mai-kash hain ki saqi le ke jam aaya to kya

zoaf apna toDne deta hai zanjiren kahin

hum mein dam kya hai jo waqt-e-intiqam aaya to kya

main samajhta hun use aaghaz-e-mustaqbil-faza

aap kahte hain koi baala-e-baam aaya to kya

ab wo izhaar-e-haqiqat ke liye Darte nahin

ab wo kahte hain KHat us ka mere nam aaya to kya

hai to na-ehsan-shanasi 'shad' lekin kya karun

kaam ban sakta tha yun bhi koi kaam aaya to kya