kya karen tadbir-e-wahshat ai dil-e-diwana hum

kyā kareñ tadbīr-e-vahshat ai dil-e-dīvāna ham

us se mil bhī to nahīñ sakte haiñ āzādāna ham

ham raheñ duurī kash-e-mai ġhair mast-e-arġhavāñ

aaj Takrā deñge har paimāne se paimāna ham

DhūñDh legā aap manzil kārvān-e-zindagī

ġhair kā ehsān kyuuñ leñ himmat-e-mardāna ham

lab rahe ḳhāmosh lekin saarī bāteñ ho ga.iiñ

ik nazar meñ kah ga.e afsāna-dar-afsāna ham

jis tarah insāñ ko le Duube haiñ shaiḳh-o-barhaman

laao sāġhar meñ Dubo deñ masjid-o-but-ḳhāna ham

jis ko duniyā meñ kisī ne muñh lagāyā hī nahīñ

mahfil-e-rindāñ meñ haiñ TuuTā huā paimāna ham

kaash koī dekh hī letā nigāh-e-lutf se

aa.e the mahfil meñ 'jāmī' kitne mushtāqāna ham

kya karen tadbir-e-wahshat ai dil-e-diwana hum

us se mil bhi to nahin sakte hain aazadana hum

hum rahen duri kash-e-mai ghair mast-e-arghawan

aaj Takra denge har paimane se paimana hum

DhunDh lega aap manzil karwan-e-zindagi

ghair ka ehsan kyun len himmat-e-mardana hum

lab rahe KHamosh lekin sari baaten ho gain

ek nazar mein kah gae afsana-dar-afsana hum

jis tarah insan ko le Dube hain shaiKH-o-barhaman

lao saghar mein Dubo den masjid-o-but-KHana hum

jis ko duniya mein kisi ne munh lagaya hi nahin

mahfil-e-rindan mein hain TuTa hua paimana hum

kash koi dekh hi leta nigah-e-lutf se

aae the mahfil mein 'jami' kitne mushtaqana hum