kya KHabar hijr ki shab ki bhi sahar hoti hai

kyā ḳhabar hijr kī shab kī bhī sahar hotī hai

kis tarah dekhiye ye raat basar hotī hai

tere dīvānoñ kī mahfil meñ hai pahchān yahī

reg-e-sahrā se sivā ḳhāk-basar hotī hai

kaam bigḌe hue ban jaate haiñ aksar mere

jab kabhī terī ināyat kī nazar hotī hai

kāTtā huuñ shab-e-furqat isī armān ke saath

Duub jaate haiñ sitāre to sahar hotī hai

zulf-o-zulf jo tūl-e-shab-e-hijrāñ ban jaa.e

chashm vo chashm jo paikān-e-jigar hotī hai

chāñdnī maañd paḌe aisī sabāhat un kī

shakl dekhe to koī rashk-e-qamar hotī hai

rasm-e-ulfat meñ yahī hotā hai aksar ai 'nūr'

Duub jaate haiñ safīne to ḳhabar hotī hai

kya KHabar hijr ki shab ki bhi sahar hoti hai

kis tarah dekhiye ye raat basar hoti hai

tere diwanon ki mahfil mein hai pahchan yahi

reg-e-sahra se siwa KHak-basar hoti hai

kaam bigDe hue ban jate hain aksar mere

jab kabhi teri inayat ki nazar hoti hai

kaTta hun shab-e-furqat isi arman ke sath

Dub jate hain sitare to sahar hoti hai

zulf-o-zulf jo tul-e-shab-e-hijran ban jae

chashm wo chashm jo paikan-e-jigar hoti hai

chandni mand paDe aisi sabahat un ki

shakl dekhe to koi rashk-e-qamar hoti hai

rasm-e-ulfat mein yahi hota hai aksar ai 'nur'

Dub jate hain safine to KHabar hoti hai