kya KHabar kab se pyasa tha sahra

kyā ḳhabar kab se pyāsā thā sahrā

saare dariyā ko pī gayā sahrā

log pagDanDiyoñ meñ kho.e rahe

mujh ko rasta dikhā gayā sahrā

dhuup ne kyā kiyā sulūk us se

jaise dhartī pe bojh thā sahrā

baḌhtī aatī thī mauj dariyā kī

maiñ ne ghar meñ bulā liyā sahrā

jaane kis shaḳhs kā muqaddar hai

dhuup meñ taptā be-sadā sahrā

kho ke apnā vajūd añdhere meñ

raat kitnā udaas thā sahrā

zehn ko vādiyāñ uThāte phireñ

aañkh meñ aa ke bas gayā sahrā

mere qadmoñ ko chūmne ke liye

raste raste se jā milā sahrā

maiñ samundar ko ghar meñ le aayā

mere dar par paḌā rahā sahrā

merā is meñ bikharnā thā 'ābid'

phir mujhe DhūñDhtā phirā sahrā

kya KHabar kab se pyasa tha sahra

sare dariya ko pi gaya sahra

log pagDanDiyon mein khoe rahe

mujh ko rasta dikha gaya sahra

dhup ne kya kiya suluk us se

jaise dharti pe bojh tha sahra

baDhti aati thi mauj dariya ki

main ne ghar mein bula liya sahra

jaane kis shaKHs ka muqaddar hai

dhup mein tapta be-sada sahra

kho ke apna wajud andhere mein

raat kitna udas tha sahra

zehn ko wadiyan uThate phiren

aankh mein aa ke bas gaya sahra

mere qadmon ko chumne ke liye

raste raste se ja mila sahra

main samundar ko ghar mein le aaya

mere dar par paDa raha sahra

mera is mein bikharna tha 'abid'

phir mujhe DhunDhta phira sahra